Tsohuwar Uwargidan Gwamnan Bauchi Ta Yi Kira Da A Zuba Jari A Ilimin ƳaƳa Mata

Daga Zainab Idris Bamalli

Tsohuwar Uwargidan Gwamnan Jihar Bauchi, Hajiya Hadiza Muhammad Abdullahi Abubakar, ta yi kira ga iyaye, shugabannin al’umma, gwamnatoci da sauran masu ruwa da tsaki da su ƙara ƙaimi wajen kawo ƙarshen aurar da ƙananan yara mata, tare da inganta iliminsu da zuba jari a makomarsu.

Hajiya Hadiza ta yi wannan kiran ne a cikin wata sanarwa da ta sanya wa hannu da kanta a ranar Lahadi, domin bikin Ranar Ƙasa da Ƙasa ta ƳaƳa Mata ta shekarar 2026, wadda taken ta shi ne, “A Kawo Ƙarshen Auren Ƙananan Yara Mata, A Kuma Zuba Jari A Cikinsu.”

Ta bayyana cewa akwai buƙatar gaggawa ta kare ƴaƴa mata daga aurar da su tun suna ƙanana da sauran munanan al’adu da ke hana su walwala, samun ilimi, haƙƙoƙinsu na asali da kuma damar cimma burinsu a rayuwa.

A cewarta, kowace yarinya tana da haƙƙin girma cikin tsaro da kulawa, samun ingantaccen ilimi, koyon sana’o’i da ƙwarewa, tare da bayar da gudummawa mai ma’ana ga iyalanta da al’ummarta.

Hajiya Hadiza, wadda ita ce matar ɗan takarar gwamnan Jihar Bauchi a zaɓen shekarar 2027 a ƙarƙashin jam’iyyar APC, ta bayyana cewa aurar da ƙananan yara mata na jefa su cikin matsaloli da dama, ciki har da barin makaranta, samun juna biyu tun da wuri, matsalolin lafiya, damuwa ta zuciya da kuma ƙarancin damar samun ci gaban tattalin arziki.

Saboda haka, ta buƙaci iyaye da masu kula da yara da su kare ƴaƴansu mata daga auren wuri, tare da tallafa musu wajen cimma burinsu na ilimi da sana’o’i.

Ta kuma ƙarfafa gwiwar ƴaƴa mata da su ɗauki karatunsu da muhimmanci, su mai da hankali kan karatu, su koyi sana’o’i masu amfani, sannan su guji matsin lambar da ka iya kawo cikas ga cimma burinsu.

Tsohuwar uwargidan gwamnan ta ce ya kamata ƴaƴa mata su yarda da kansu, su ƙarfafa gwiwarsu, tare da fahimtar cewa bai kamata a tauye makomarsu saboda kasancewarsu mata ko yanayin da suke ciki ba.

Ta kuma yi kira ga iyaye da su sauke nauyin da ke kansu ta hanyar samar wa ƴaƴansu kulawa, shawarwari masu kyau, goyon baya da ƙarfafa musu gwiwa.

A cewarta, iyaye mata suna da muhimmiyar rawa wajen gina ɗabi’a, kyawawan halaye, ƙarfin zuciya da makomar ƴaƴansu maza da mata.

Ta jaddada muhimmancin sauraron yara, fahimtar buƙatunsu da ƙarfafa tattaunawa a tsakaninsu da iyayensu, domin samar da yanayin da ƴaƴa mata za su ji daɗin bayyana damuwarsu da neman shawarwari.

Hajiya Hadiza ta ce maimakon gaggawar aurar da ƴaƴansu mata, ya kamata iyaye su tallafa musu su kammala karatunsu, su koyi sana’o’i, sannan su zama mutane masu dogaro da kansu da za su iya bayar da gudummawa ga ci gaban al’umma.

Haka kuma, ta buƙaci gwamnatoci a dukkan matakai da su ƙarfafa manufofi da shirye-shiryen kare ƴaƴa mata daga auren wuri, inganta damar samun ilimi mai inganci, samar da tallafin karatu da koyar da sana’o’i, musamman ga waɗanda suka fito daga iyalai marasa ƙarfi.

Ta kuma yi kira ga shugabannin addinai da na gargajiya, ƙungiyoyin farar hula, malamai da sauran al’umma da su haɗa kai wajen yaƙi da munanan al’adu da kuma inganta haƙƙoƙi da walwalar ƴaƴa mata.

Tsohuwar uwargidan gwamnan ta bayyana cewa zuba jari a cikin ƴaƴa mata ya wuce batun tura su makaranta kawai, domin ya haɗa da samar musu da jagoranci, kula da lafiya, ƙwarewar amfani da fasahar zamani, damar shugabanci da kariya daga cin zarafi.

Ta ce wajibi ne al’umma su fahimci cewa ƴaƴa mata suna da muhimmiyar gudummawar da za su bayar wajen ci gaba, don haka bai kamata a hana ko wace yarinya cimma burinta saboda talauci, nuna wariya ko munanan al’adu ba.

A ƙarshe, Hajiya Hadiza ta yi kira ga dukkan masu ruwa da tsaki da su mayar da saƙon Ranar Ƙasa da Ƙasa ta ƳaƳa Mata zuwa ayyukan zahiri ta hanyar kare ƴaƴa mata, kawo ƙarshen auren wuri, tallafa wa iyaye mata da iyalai, da tabbatar da cewa kowace yarinya ta samu damar koyo, girma da samun nasara a rayuwa.