Lula Ya Lashe Zaɓen Shugabancin Brazil, Sai Dai Kuma Flávio Bolsonaro Ya Ƙi Amincewa Da Sakamakon

Daga: Hauwa’u Maikudi

Shugaban ƙasar Brazil, Luiz Inácio Lula da Silva, ya sake lashe zaɓen shugaban ƙasar da aka gudanar ranar Lahadi, 25 ga Oktoba, 2026, inda ya doke abokin hamayyarsa, Flávio Bolsonaro, domin samun wa’adi na huɗu a shugabancin ƙasar.

Hukumar zaɓen Brazil ta tabbatar da cewa Lula ya samu ƙuri’u 64,256,232, kwatankwacin kashi 51.79 cikin 100 na ƙuri’un da aka amince da su, yayin da Flávio Bolsonaro ya samu ƙuri’u 59,826,041, wato kashi 48.21 cikin 100. 

Sai dai Flávio Bolsonaro ya ƙi amincewa da sakamakon zaɓen, inda ya bayyana cewa zai nemi a soke shi. Ya nuna rashin gamsuwarsa da matakin tsawaita lokacin kada ƙuri’a da aka ɗauka a wasu wurare saboda matsalolin sufuri.

Rahoton kamfanin dillancin labarai na Reuters ya bayyana cewa Flávio ya sha kaye da fiye da ƙuri’u miliyan huɗu. Sai dai masu sharhi kan harkokin siyasa sun bayyana cewa ƙalubalantar sakamakon na iya fuskantar matsaloli wajen samun nasara.

Nasarar ta bai wa Lula damar komawa kan karagar mulki a wa’adi na huɗu, duk da cewa bai yi wa’adin ba tare da katsewa ba. A baya, ya shugabanci Brazil daga shekarar 2003 zuwa 2010, sannan ya sake komawa mulki a shekarar 2023.

Ana sa ran sabon wa’adinsa zai fara ranar 5 ga Janairu, 2027.

Majiyoyi: Reuters da Hukumar Zaɓen Brazil.

TNL HAUSA