Me Kuka Sani A Rayuwar Sir Ahmadu Bello?

Daga Hadi Bawa 

Wani tsohon hoto da ba kasafai ake gani ba ya nuna marigayi Sir Ahmadu Bello, Sardaunan Sakkwato, kuma Firaministan Arewacin Nijeriya, yana buga wasan Fives a Kaduna a ƙarshen shekarun 1950.

Hoton ya bayyana wani ɓangare na rayuwar Sardaunan da ba a cika tunawa da shi ba, inda ya nuna cewa baya ga nauyin da ke tattare da shi na shugabancin jama'a a siyasa da mulki, yana samun lokaci domin wasanni da motsa jiki.

Fives wasa ne na gargajiya da ya samo asali daga Birtaniya, inda ‘yan wasa ke amfani da hannayensu wajen buga ƙwallo zuwa bangon wani fili na musamman. Wasan ya samu karɓuwa a wasu makarantu da cibiyoyin mulkin-mallaka, kuma daga baya ya samu masu sha’awa a tsakanin wasu daga cikin manyan mutane da ma’aikatan gwamnati a Arewacin Nijeriya.

Abin ban sha’awa shi ne, har yanzu akwai filayen wasan Fives da ke bayan tsohon gidan Sir Ahmadu Bello a Arewa House, Kaduna. 

Masu sha’awar wasan na ci gaba da amfani da filayen, lamarin da ke nuna cewa wani ɓangare na tarihin wancan zamani har yanzu yana nan daram.

Haka kuma, hoton na nuni da irin hulɗar zamantakewa da musayar al’adu da suka kasance wani ɓangare na rayuwar Nijeriya a shekarun ƙarshe na mulkin mallakar Birtaniya.

Kamar yadda shafin labarai na Bygone Narratives ya bayyana, an fi sanin Sir Ahmadu Bello ne saboda rawar da ya taka a siyasar Nijeriya da kuma gudunmawarsa wajen ci gaban Arewacin ƙasar. Sai dai irin wannan hoto yana bayyana wani ɓangare na rayuwarsa da ba a cika gani ko tunawa da shi ba.

Irin waɗannan hotuna na tunatar da mu cewa manyan mutane a tarihi ba ofisoshin da suka riƙe kaɗai ba ne. Bayan hotunan hukuma, jawabai na siyasa da manyan shawarwarin da suka yanke, akwai rayuwar yau da kullum, abubuwan sha’awa da lokutan nishaɗi da suka kasance wani ɓangare na rayuwarsu.