PDP Ta Dakatarda Khamisu Mailantarki da Usman Garry Daga Jm'iyyar

Jam’iyyar PDP reshen Jihar Gombe ta dakatar da Hon. Khamisu Ahmed Mailantarki da Hon. Usman Aliyu (Garry) daga jam’iyyar bisa zargin aikata ayyukan da suka saba wa muradun jam’iyya.

An fitar da sanarwar dakatarwar ne bayan kammala wani taron gaggawa na haɗin gwiwa tsakanin Kwamitin Gudanarwa na PDP na Jihar Gombe da shugabannin jam’iyyar na mazabun Dawaki da Herwagana, inda ’yan takarar biyu suka fito.

PDP ta Jihar Gombe ta ƙara da cewa, duk da cewa ’yan takarar biyu sun amince da kansu su shiga zaɓen fidda gwani na ɗan takarar gwamnan jam’iyyar da aka gudanar kwanan nan, wasu matakan da suka ɗauka sun kai matsayin babban rashin da’a da kuma karya kundin tsarin mulkin jam’iyyar, wanda ka iya haifar da rarrabuwar kawuna da ruɗani tsakanin mambobin jam’iyyar.

Shugabannin jam’iyyar na jihar sun bayyana rashin jin daɗinsu kan kalaman Hon. Khamisu Ahmed Mailantarki a wata hira da ya yi da manema labarai, inda ya ayyana kansa a matsayin wanda ya lashe zaɓen fidda gwani na PDP da aka gudanar ranar 29 ga Satumba, 2026.

Saboda haka, jam’iyyar ta dakatar da ’yan takarar biyu na tsawon wata guda, sannan ta miƙa batun nasu ga Kwamitin Ladabtarwa na jam’iyyar domin ɗaukar matakan da suka dace.

Sanarwar na ɗauke da sa hannun AbdulKadir Ahmad Dukku, Sakataren Yaɗa Labarai na PDP na Jihar Gombe.

30 ga Satumba, 2026.